नाथसखा आयुर्वेदिक दवाखान्याला महावितरणचे अभय.

बोरमलनाथ मंदिर परिसरातील वनविभागाच्या जागेतील नाथसखा आयुर्वेदिक दवाखाना.

महावितरण कडे तक्रार करूनही कारवाई नाही; ग्रामस्थांमध्ये तीव्र नाराजी !

केडगाव (प्रतिनिधी) -बोरीपार्धी,ता.दौंड,जि.पुणे.येथील बोरमलनाथ मंदिर परिसरात एक तिन मजली इमारत उभी असून तिच्या मध्ये नाथसखा आयुर्वेदिक चिकित्सालय एवं पंचकर्म केंद्र डाॅ.निलेश कैलास शेलार चालवित आहे. बोरमलनाथ देवस्थान बचाव समितीने वनबलप्रमुख महाराष्ट्र राज्य नागपूर,जिल्हाधिकारी पुणे यांच्याकडे सदर इमारत विनापरवाना,बेकायदेशीर रित्या वनविभागाच्या जागेत अतिक्रमण करून बांधली असुन सदर अतिक्रमण करणारांवर कायदेशीर कारवाई करून झालेले अतिक्रमण तात्काळ निष्कासित करण्यात यावे याबाबत लेखी तक्रार दिली असुन वन विभागाने सदर अतिक्रमणा बाबत वन गुन्हा दाखल केला असून तसा सविस्तर पंचनामा देखील केला आहे व लवकरच पुढील कारवाई होणार असल्याचे वनविभागाच्या वरिष्ठ अधिकाऱ्यांनी सांगीतल्याचे बोरमलनाथ बचाव समितीचे उपाध्यक्ष व पुरोगामी संघर्ष परिषदेचे पुणे जिल्हा वरिष्ठ उपाध्यक्ष सुरेश पवार यांनी सांगीतले.

सदर इमारतीत नाथसखा आयुर्वेदिक दवाखाना सुरू असुन दवाखान्यास विद्युत मंडळाकडून अधिकृत लाइट कनेक्शन नसल्याची माहीती बचाव समितीस मिळताच बचाव समितीने दिनांक-१३.६.२०२५ रोजी कार्यकारी अभियंता केडगाव, अधिक्षक अभियंता ग्रामिण सर्कल बारामती,मुख्य अभियंता उर्जा भवन बारामती यांच्याकडे विजचोरी बाबत तक्रार करून कारवाईची मागणी केली होती. त्याप्रमाणे बोरमलनाथ मंदिर परिसरातील व देवस्थान जमिनीतिल बेकायदेशीर लाईट कनेक्शनवर कारवाई साठी विद्युत मंडळाची एक टिम आली होती.सदर टीमने कारवाई करून काही लाईट कनेक्शन बंद केली व विजचोरी केलेल्या कनेक्शनवर दंडात्मक कारवाई करत असल्याचे विद्युत मंडळाच्या अधिकाऱ्याकडून सांगण्यात आले होते.परंतू त्याबाबत आद्याप पर्यंत दंड केल्याची कुठलीच माहीती विद्युत मंडळाकडून बचाव समितीच्या सदस्यांना मिळाली नाही. उलट त्याच ठिकाणी पुन्हा बेकायदेशीर कनेक्शन जोडून विजचोरी सुरू असल्याची माहीती बचाव समीतिच्या सदस्यांनी दिली.

सदर इमारतीत वातानुकूलित यंत्रणा(AC) विविध प्रकारच्या मशनरी व लाईट सुरू आहे मग सदर इमारतीस विद्युत मंडळाचे अधिकृत कनेक्शन नसताना सदरची लाईट कुठून आली जर अधिकृत विद्युत कनेक्शन नसताना दुसरीकडून घरगुती वापराची लाईट घेतली असेल आणी दवाखान्याला वाणिज्य (कमर्शियल) कनेक्शनची गरज असताना बेकायदेशीर वीज जोडली असेल तर हा वीज चोरीचा गुन्हा असल्याचे मत बचाव समितीच्या सदस्यांनी मांडले आहे.एकतर सदर दवाखाना हा वनविभागाच्या हद्दीत अतिक्रमण करून बांधला आहे आणि त्याची ग्रामपंचायत दप्तरी कुठेही नोंद नसल्याचे ग्रामपंचायत कार्यालयाने लेखी उत्तर दिले आहे. सदर दवाखान्यास अधिकृत वीज जोडणी नसावी आणि जर ती असेल तर ती बेकायदेशीर आहे असे बचाव समितीचे म्हणणे आहे. त्यामुळे नाथसखा आयुर्वेदिक दवाखान्याच्या वीज चोरी बाबत तक्रार करूनही विद्युत मंडळ काहीच कार्यवाही करत नसेल तर विद्युत मंडळाकडून या दवाखान्याला अभय मिळाले आहे का ? अशी चर्चा ग्रामस्थांमध्ये रंगू लागली आहे. जर दवाखान्याच्या वीज चोरी विरोधात लवकरात लवकर कारवाई केली नाही तर विद्युत मंडळाच्या विरोधात मोठे आंदोलन उभे करणार असल्याचे बोरमलनाथ देवस्थान बचाव समितीचे अध्यक्ष व बोरीपार्धी ग्रामपंचायतचे सदस्य अशोक अडसूळ यांनी सांगितले.