अशोक अडसूळ
बोरमलनाथ मंदिर परिसरातील वनविभागाच्या जागेतील नाथसखा आयुर्वेदिक दवाखाना.
केडगाव :- पुणे जिल्ह्यातील दौंड तालुक्यातील बोरीपार्धी येथील बोरमलनाथ मंदिर परिसरात एक खळबळजनक प्रकार समोर आला आहे. वनविभागाच्या शासकीय जागेवर बेकायदेशीरपणे अतिक्रमण करून उभारण्यात आलेल्या इमारतीमध्ये ‘नाथसखा आयुर्वेदिक चिकित्सालय एवं पंचकर्म केंद्र’ धडधडीतपणे सुरू असल्याचे उघडकीस आले आहे. धक्कादायक बाब म्हणजे, या दवाखान्याची शासकीय परवानगी मिळवण्यासाठी चालकांनी दुसऱ्याच ठिकाणची बोगस किंवा बनावट कागदपत्रे जोडल्याचा गंभीर आरोप ग्रामस्थांनी केला आहे.
नेमका काय आहे प्रकार ?
मिळालेल्या माहितीनुसार, बोरीपार्धी (चौफुला) येथील बोरमलनाथ मंदिर परिसरात एक तीन मजली टोलेजंग इमारत उभी आहे. ही इमारत वनविभागाच्या मालकीच्या जागेवर अतिक्रमण करून बांधण्यात आली असुन याच अतिक्रमित इमारतीमध्ये ‘नाथसखा आयुर्वेदिक चिकित्सालय’ राजरोसपणे चालवले जात असल्याचा दावा ग्रामस्थांनी केला आहे.
कागदपत्रांची हेराफेरी आणि प्रशासनाची दिशाभूल :-
कोणताही दवाखाना किंवा वैद्यकीय केंद्र सुरू करण्यासाठी आरोग्य विभाग आणि स्थानिक प्रशासनाची रीतसर परवानगी आवश्यक असते आणी तशी बाॅम्बे नर्सिंग होम ॲक्ट प्रमाणे १५ खाटांची परवानगी नाथसखा आयुर्वेदिक दवाखान्याच्या चालकांनी मिळवली आहे.मात्र, हे चिकित्सालय वनविभागाच्या वादग्रस्त आणि अतिक्रमित जागेत असल्याने, तेथील परवानगी मिळणे अशक्य होते. यावर तोडगा म्हणून दवाखान्याच्या चालकांनी प्रशासनाची दिशाभूल करत धायगुडेवाडी येथील बोरमलनाथ देवस्थानच्या खाते क्र.१०३३ जमीन गट नंबर १४४ चे सातबारा आठ ‘अ’ उतारे, ग्रामपंचायत बोरीपार्धी यांचा ‘नाथसखा आयुर्वेदिक चिकित्सालय’ या नावाने व्यवसाय करण्यासाठीचा (ना हरकत प्रमाणपत्र) व्यवसाय दाखला,बोरमलनाथ देवस्थान इनाम जमिन गट नंबर १४४ क्षेत्र १४ हे.४० आर पैकी ०० हे.०१.२१ आर (१३०४ चौ.फुट) मिळकत बोरमलनाथ देवस्थानचे ट्रस्टी कैलास एकनाथ शेलार यांनी दवाखान्याचे चालक निलेश कैलास शेलार यांना दरमहा ५००० रू.भाडेपट्टीवर दहा वर्षांसाठी दिल्याचा करारनामा,आर्किटेक्चरल प्लॅन (नकाशा), सिव्हिल इंजिनिअर चे (कंपलेशन सर्टिफिकेट) बांधकाम पूर्ण झाल्याचा दाखला.
ही दुसरीकडची कागदपत्रे आणि पुरावे सादर करून दवाखान्याची परवानगी लाटल्याची माहिती समोर येत आहे.
वास्तविक सत्य :-
१) सदर दवाखाना बोरमलनाथ देवस्थान जमीन गट नंबर १४४ मध्ये असल्याचे कागदोपत्री दाखवले आहे.परंतु प्रत्यक्षात मात्र तो वनविभागाची
जमीन गट नं.२३३/६ ‘अ’ मधे असल्याचा दावा करण्यात आला आहे. यापुर्वी या गटात झालेल्या अतिक्रमणांचा पंचनामा मंडल अधिकारी वरवंड
व वनविभाग दौंड यांनी केला असुन तो पंचनामा व जागेचा नकाशा सत्यप्रकाश न्यूज च्या हाती लागला असुन त्याची सविस्तर बातमी लवकरच
प्रसिद्ध होईल.
२) ग्रामपंचायत बोरीपार्धी यांनी दिलेल्या व्यवसाय दाखल्यामध्ये अनेक त्रुटी असल्याचा दावा ग्रामस्थांनी केला आहे.सदर दाखला कोणी दिला ?
तो देताना वस्तुस्थितीची पडताळणी केली होती का ? त्याबाबत लवकरच सविस्तर बातमी प्रसिद्ध करण्यात येईल.
३) सदर जागा दवाखान्यास भाडेपट्टीवर देताना धर्मदाय आयुक्त यांची परवानगी घेतली आहे का ? असा सवाल ग्रामस्थांमध्ये निर्माण झाला आहे.
४) पुणे महानगर प्रदेश विकास प्राधिकरण (PMRDA) यांचा हॉस्पिटलचा नकाशा व ईमारत बांधकाम परवाना कागदपत्रात नसल्याचे दिसत
आहे.
५) हॉस्पिटलच्या जागेत (फायर फायटिंग सिस्टीम) अग्निशामक यंत्रणा असल्याबाबत अग्निशामक विभागाचे प्रमाणपत्र कागदपत्रात सामील दिसत
नाही.
६) सदर हॉस्पिटलच्या वाणिज्यिक (कमर्शियल) लाईट बिलाची पावती कागदपत्रांमध्ये सामील दिसत नाही.
७) हॉस्पिटल मधील कचरा व्यवस्थापना साठी महाराष्ट्र प्रदूषण नियंत्रण मंडळाचे प्रमाणपत्र कागदपत्रात दिसत नाही.
इत्यादी प्रकारच्या अनेक त्रुटी असताना देखील सदर हॉस्पिटलला परवानगी कशी मिळाली असा संतप्त सवाल नागरिकांमधून उठत आहे.
दोषींवर तात्काळ कारवाईची मागणी
शासकीय वन जमिनी हडप करून त्यावर व्यावसायिक इमारती उभारल्या जात असताना वनविभाग झोपला आहे का ? असा संतप्त सवाल स्थानिक नागरिकांमधून उपस्थित केला जात आहे. तसेच, आरोग्य विभागाने कागदपत्रांची प्रत्यक्ष पडताळणी न करताच परवानगी कशी दिली, याबद्दलही आश्चर्य व्यक्त होत आहे. वनविभागाच्या जागेवरील हे बेकायदेशीर अतिक्रमण तात्काळ हटवण्यात यावे आणि बनावट कागदपत्रांच्या आधारे शासनाची फसवणूक करणाऱ्या दवाखान्याच्या चालकांवर व बेकायदेशीरपणे दवाखान्याला परवानगी मिळवून देण्यासाठी मदत करणाऱ्या अधिकारी व पदाधिकाऱ्यांवर कडक फौजदारी गुन्हा दाखल करण्यात यावा, अशी मागणी आता जोर धरू लागली आहे. या प्रकरणाची सखोल चौकशी झाल्यास मोठे रॅकेट समोर येण्याची शक्यता वर्तवली जात आहे.
संदिप चव्हाण
