दौंड तालुका मराठी पत्रकार संघाच्या नूतन पदाधिकाऱ्यांचा पदग्रहण सोहळा उत्साहात संपन्न !

बोरीपार्धी : दौंड तालुका मराठी पत्रकार संघाच्या नूतन पदाधिकाऱ्यांचा पदग्रहण सोहळा गुरुवारी दिनांक-९.७.२०२६ रोजी श्री बोरमलनाथ मंदिर सभागृहात उत्साहपूर्ण वातावरणात पार पडला. यावेळी विविध क्षेत्रातील मान्यवरांच्या उपस्थितीत नूतन पदाधिकाऱ्यांचा सत्कार करण्यात आला तसेच पत्रकारितेची सामाजिक जबाबदारी व बांधिलकी अधोरेखित करण्यात आली.कार्यक्रमाच्या अध्यक्षस्थानी मराठी पत्रकार संघाचे राज्य उपाध्यक्ष विवेक इनामदार तसेच प्रमुख पाहुणे म्हणून पुणे जिल्हा परिषदेचे अध्यक्ष विरधवल जगदाळे, दौंड पंचायत समितीचे सभापती सुखदेव चोरमले, शरदचंद्र पवार राष्ट्रवादी काँग्रेसचे तालुकाध्यक्ष रामभाऊ टुले, भारतीय जनता पक्षाचे तालुकाध्यक्ष राहुल हंडाळ, ज्येष्ठ साहित्यिक दशरथ यादव, वृक्षमित्र कृणाल नरुटे तसेच दौंड बार असोसिएशनचे अध्यक्ष ॲड. पोपटराव फुलारी उपस्थित होते.

यावेळी बोलताना विरधवल जगदाळे म्हणाले की, “पत्रकार हा समाजाचा आरसा असून समाजातील वास्तव सातत्याने जनतेसमोर मांडण्याचे महत्त्वपूर्ण कार्य पत्रकार करतात. त्यामुळे लोकशाही अधिक सक्षम आणि जिवंत राहण्यास मदत होते.”सुखदेव चोरमले यांनी सांगितले की, “दौंड तालुक्यातील पत्रकार विविध सामाजिक प्रश्न प्रभावीपणे मांडत असून अनेक प्रश्न मार्गी लावण्यात त्यांचे योगदान मोलाचे आहे. पत्रकार संघाच्या अडीअडचणी सोडविण्यासाठी आमदार राहुल कुल यांच्या मार्गदर्शनाखाली आम्ही कायम कटिबद्ध राहू.”

रामभाऊ टुले म्हणाले की, “पत्रकार समाजमनाचे प्रतिनिधित्व करतात. तालुक्यात विविध पत्रकार संघटना असल्या तरी सर्वच पत्रकार चांगले काम करत असून अधिक नेटाने आणि जबाबदारीने कार्य करण्याची गरज आहे.”राहुल हंडाळ यांनी मराठी पत्रकार संघाच्या राज्यव्यापी कार्याचा गौरव करत नूतन पदाधिकाऱ्यांना शुभेच्छा दिल्या. ज्येष्ठ साहित्यिक दशरथ यादव यांनी पत्रकारितेच्या जुन्या काळातील अनुभव कथन करत मार्गदर्शन केले.वृक्षमित्र कृणाल नरुटे यांनी वृक्षसंवर्धनाचा संदेश देत पत्रकारांनी पर्यावरण जनजागृतीतही सक्रिय सहभाग घ्यावा, असे आवाहन केले. ॲड. पोपटराव फुलारी यांनी पत्रकारांना कायदेशीर मदतीची आवश्यकता भासल्यास दौंड बार असोसिएशनतर्फे सहकार्य करण्याची ग्वाही दिली.

यावेळी दौंड तालुका मराठी पत्रकार संघाचे नूतन अध्यक्ष संदीप शिवाजी सोनवणे, उपाध्यक्ष गौरव दिवेकर, कार्याध्यक्ष दीपक पवार, सचिव संदीप भालेराव, संघटक बाळासाहेब मुळीक, प्रसिद्धी प्रमुख राहुलकुमार अवचट, खजिनदार भाऊसाहेब ठाकूर, सहसचिव अविनाश लोंढे, कार्यकारिणी सदस्य संदीप चव्हाण, सुशांत जगताप, अंकुश काळे, धनाजी ताकवणे, नितीन गव्हाणे, राहुल बिचकुले, विठ्ठल थोरात, दत्तात्रय डाडर, सोनबा ढमे, सचिन रुपनवर,,आण्णा बारवकर अमोल शिंदे. सतीश गायकवाड आणि दीपाली दिवेकर यांचा मान्यवरांच्या हस्ते सत्कार करण्यात आला.कार्यक्रमास पत्रकार, विविध सामाजिक संघटनांचे पदाधिकारी, राजकीय क्षेत्रातील मान्यवर आणि नागरिक मोठ्या संख्येने उपस्थित होते. कार्यक्रमाचे आयोजन दौंड तालुका मराठी पत्रकार संघाच्या वतीने करण्यात आले होते.